Rusiye ordusı noyabrniñ 24-ne keçer gecesi Ukrayinağa 162 darbe uçucısızınen ücüm etti, 80-den ziyadesi – “Şahedler”, dep bildirdi Ukrayina Silâlı quvetleriniñ Ava küçleri. Dronlar Rusiyede beş yönelişten, işğal etilgen Qırımda Sarabuz qasabasından uçurıldı.
“İlk malümatqa köre, saat 09:00-ğa qadar, ava mudafaası memleketniñ şimali, cenübi ve şarqında Shahed, “Gerber” ve diger dronlarnı urdı/bastırdı”, – dep aytıla haberde.
Arbiylerniñ malümatına köre, 15 yerde 37 darbe uçucısızınıñ ücümi ve bir yerde tüşürilgen dron parçaları qayd etildi.
“Eñ çoq Harkiv, Çerniğiv, Dnipropetrovsk vilâyetlerinde vatandaş infrastruktura ve mustaqil azbarlar zarar kördi. Ne yazıq ki, vatandaşlar arasında qurbanlar bar”, – dep aytıla haberde.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.