Dekabrniñ 1-ne keçer gecesi Rusiye Ukrayinağa 89 darbe Shahed, "Gerber" ve diger uçucısızınen ücüm etti, dep aytıla Ukrayina Silâlı quvetleri Ava küçleriniñ haberinde.
Arbiylerniñ malümatına köre, Rusiye küçleri bu yönelişlerden dronlarnı uçurdı: Orel, Kursk, Millerovo, Primorsko-Ahtarsk – Rusiye, Çavda burnu – işğal etilgen Qırım.
Ava ücümini aviatsiya, zenit raketa ordusı, radioelektron küreş bölükleri ve uçucısız sistemaları, Ukrayina Mudafaa quvetleriniñ mobil ateş gruppaları keri qaytardı, dep aytıla haberde.
İlk malümatqa köre, saat 08:30-ğa qadar, ava mudafaası memleketniñ şimali, cenübi ve şarqında 63 Shahed, "Gerber" ve diger uçucısıznı tüşürdi ya da bastırdı. Doquz yerde 26 darbe uçucısızınıñ ücümi qayd etildi.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.