Rusiye quvetçileri Bağçasarayda 74 yaşındaki tarihçı Enver Seitmetmetovnı tutıp, Aqmescitke alıp ketti, dep bildire "Qırım birdemligi" cemaat birleşmesi.
"Bağçasarayda 74 yaşındaki tarihçı Enver Seytmemetovnıñ evine quvetçiler keldi. O, siyasiy mabüsler Seytumer, Osman, Abdulmecit Seytumerovlarnıñ dayısıdır. "Qırım birdemligi"ne belli olğanı kibi, qartanıñ evine tahminen 10 quvetçi kelgen. Enver Seitmemetovğa qararnı oqup, Aqmescitke alıp kettiler", — denile beyanatta.
"Qırım birdemligi" bildirgenine köre, Rusiye quvetçileri oña qarşı memuriy protokol tize, soñra oturışuvğa 1-nci mahkeme bölügine alıp ketecekler.
Rusiye quvetçileriniñ tutuluv ve protokol tizilüv sebepleri aqqında resmiy izaatları şimdilik yoq.
İlk küz ayınıñ soñunda Qırımtatar resurs merkezi, Qırım ilhaqından soñ Rusiye akimiyeti tarafından siyasiy sebeplerden taqip etilgen qırımlılarnıñ sayısı artqanını bildirgen edi. Şimdilik olarnıñ sayısı 447 insan oldı, olardan 258-i qırımtatardır.