Kıyivde, boş aynıñ 25-ne keçken gecesi Rusiye ücüminde elâk olğanlarnıñ sayısı altığa arttı, dep bildire yerli akimiyet ve Fevqulâde vaziyetler hızmetiniñ malümatı.
"Svâtoşınsk rayonında dört kişi elâk oldı, eñ azından üçü yaralandı", — dep bildirdi Kıyiv şeer arbiy memuriyetiniñ yolbaşçısı Timur Tkaçenko.
Daa evel Dnipro rayonında eki kişi, şu cümleden 86 yaşında qadın elâk olğanı belli edi. Fevqulâde vaziyetler devlet hızmetiniñ malümatına köre, 9 qatlı binağa uruldı. 5-8 qatlarda çıqqan yanğınlar söndürildi, dep qoştı Fevqulâde vaziyetler nazirligi. Dnipro rayonında ücüm sebebinden Entusiastlar soqağında naqliyat areketi toqtatıldı.
Şeer yolbaşçısı Vitaliy Kliçko, Kıyivde doquz yaralanğan kişi aqqında bildirdi, olarnıñ arasında bir bala bar, üç büyük hastahanege alındı.
Şeer yolbaşçısınıñ aytqanına köre, Svâtoşınsk rayonında patlav neticesinde mesken olmağan binada viraneler oldı, ve, ilk malümatqa köre, viraneler altında insanlar ola bile.
Fevqulâde vaziyetler devlet hızmetinde qayd etkenlerine köre, Peçersk rayonında 22 qatlı mesken evniñ 4-5 qatı seviyesinde patlavlar oldı.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.