Rusiye işğal etken Qırımda partizanlar ve istihbaratçılar – olar kim?

Ukrayina arbiyleri haber etkenine köre, Qırımda tirenüv areketinden alınğan malümat esasında müim Rusiye arbiy obyektleri yoq etile. Qırımlılar Ukrayina Silâlı quvetlerine istilâcınen cenk yapmağa yardım ete, Ukrayina istihbaratı angi usullarnı qullana ve Rusiye uquq qoruyıcıları ne yapa – Qırım.Aqiqat maqalesinde.

Bu künleri Ukrayina Silâlı quvetleriniñ Mahsus operatsiyalar küçleri oktâbrniñ 6-nda Qırımda Rusiye arbiy obyektlerine qarşı darbeler aqqında bildirdi.

“Mahsus areketlerniñ final fazası 2025 senesi oktâbrniñ 6-nda oldı, lâkin telükesizlik maqsadınen aydınlatılmadı. Mahsus operatsiyalar küçleriniñ Tirenüv areketi vekilleri Aqmescit civarındaki İşün (Udaçnoye) köyünde Rusiye 18-inci ordusınıñ silâ anbarı yeri aqqında istihbarat malümatını taptı. Nevbetteki mahsus istihbarat duşman arsenalınıñ yerleşüvini tasdıqladı”, – dep qayd etile haberde.

Oktâbrniñ 6-na keçer gecesi silâ anbarına mahsus operatsiyalar küçleri tarafından darbege oğradı.

Haberde qayd etilgenine köre, mahsus operatsiyalar küçleri qırımlılardan – tirenüv areketiniñ vekillerinden istihbarat malümatını aldı. Bu duşmannıñ arbiy obyektlerine darbe endirmege yardım etkenlernen işbirligini köstere.

Qırımlı partizanlar kimler?

“Partizan” sözü italyan tilinden kele. Duşman işğal etken topraqta silâlı partizan quvetleri erkânında memleketiniñ azatlığı ve mustaqilligi oğrunda göñülli şekilde silâlı küreş alıp barğanlarğa böyle aytalar.

Ukrayina kütleviy haber vastaları Ukrayina Silâlı quvetleriniñ göñülli yardımcılarını partizan dep adlandıra, amma bu ıstılağa tek “Ateş” areketiniñ iştirakçileri kelişe.

Partizan areketi 2022 senesi şekillendi ve ilhaq etilgen Qırımda, işğal etilgen Ukrayina topraqlarında ve Rusiyede çalışa. “Ateş” Ukrayinanıñ azatlığı ve mustaqilligi oğrunda küreşini añlata. Başta ukrayin ve qırımtatarlar areket temelini yapa, amma ileride erkânı kenişledi.

Partizanlar Rusiye arbiyleri ve müim infrastruktura obyektleri aqqında malümat toplap, Ukrayina silâlı quvetlerine bere. Böyle işbirligini Ukrayina Mudafaa nazirligi Baş istihbarat idaresi tasdıqladı.

“Ateş” zorbalıq aktsiyalarından mesüliyetini aldı: 2022 senesi oktâbr ayında Aqyar ve Aqmescit hastahanelerinde Rusiye arbiyleriniñ ölümi, 2022 senesi noyabr ayında Kirill Stremousovnıñ öldürilüvi, 2023 senesi mart ayında Nova Kahovka yolbaşçı muavinine suiqast etüv, 2023 senesi mayısta Zahar Prilepinge suiqast etüv ve diger qorquzuv aktsiyaları. “Ateş” böyle aktsiyalarnıñ fotoresimleri ve videolarını köstermedi.

Amma işğal etilgen topraqlarda ve Rusiyede demiryollarda diversiyalarnıñ, Rusiye arbiyleriniñ maşinalarını ateşke berilüvine dair deliller bar.

Böylece, meselâ, 2025 senesi noyabrniñ 9-nda “Ateş” areketi Aqmescitteki demiryolda diversiya aqqında bildirdi ve yanğın videosını derc etti.

“Boyle aktsiyalar em arbiy, em propaganda ceetinden pek müim. Demiryolda diversiya cebege silâ ve tehnika, yanıcı-yağlayıcı malzeme ve arbiy areketlerniñ teminlevi içün kerek olğan er şeyniñ ketirilüvini zorlaştıra. Qırımlılar ise Ukrayina Qırım içün tek onıñ tışında degil, yarımadada da cenkleşkenini köre”, – dep izaatladı Qırım.Aqiqatqa qırımlı arbiy ekspert, sabıq Ukrayina zabiti, Ukrayina Silâlı quvetleriniñ yedek ast polkovniki adını gizli tutmaq şartınen.

Qırımda “Krımskiy veter” Telegram kanalı da istihbarat malümatını toplay – esnasta onıñ abunecileri iştirak ete. Kanal idarecileriniñ beyanatına köre, malümat Ukrayina Silâlı quvetlerine tez berile.

Böylece, meselâ, yaqında Keriçten Aqmescitke “Pantsir-S-1” zenit-raketa kompleksiniñ taşıluvı qayd etildi.

Aqyar körfezinde Rusiye Federatsiyası Qara deñiz flotunıñ gemi ve katerleriniñ yerleşüvi ve areketi qayd etile.

“Krımskiy veter” göñülli istihbaratçıları zenit raketa kompleksleri ve radiolokatsion stantsiyalarnıñ yerleşüvini, raketa, uçaq ve vertolötlarnı, arbiyler ve infrastruktura obyektleriniñ vaziyetini qayd ete.

Kanal idarecileri bildirgenine köre, alınğan malümatnıñ tek dörtte biri derc etile, çünki qalğan malümat tesirli ola ve aydınlatılması körgenlerge zarar ketire bile.

Qırımlılar Ukrayina Mudafaa nazirligi Baş istihbarat idaresiniñ mahsus botu vastasınen de malümat bere – @gur_official_bot, ve Ukrayina istihbaratçıları Rusiye işğal etken topraqlarda yaşağanlarnıñ büyük qısmı bu şekilde malümat bere, dep haber ete.

“İstihbaratnıñ noqtaiy-nazarına köre – bu mükemmel variant, istihbarat ağı keniş ve közeticiler Qırımnıñ er bir köşesinde buluna. Tek Qırımda çoq olmağan insansız topraqlarda Rusiye arbiyleri gizli areketler yapa bile. Qalğan vaziyetlerde olar, şübhesiz, açıq”, – dep qayd ete qırımlı arbiy ekspert.

Soraştırmaq, teşkermek ve tekrar teşkermek

İstihbarat alğan malümatnı nasıl qullana Qırım.Aqiqatqa yedekniñ 3-ünci rang kapitanı, evelden Ukrayina arbiy istihbaratında hızmet etken kişi gizlilik şartınen tarif etti.

Sabıq istihbaratçınıñ aytqanına köre, alınğan istihbarat malümatı daima teşkerilmeli.

“İstihbarat malümatı yüz fayız doğru sayılsın dep, bir qaç bağlı olmağan menbadan alınmalı ya da diger istihbarat yönelişlerinde teşkerilmeli – uydu, radioelektron ve ilâhre”, – dep ayta yedek zabiti.

Misal olaraq o, Qırımdaki menbadan bir mesken yerge yaqın zenit raketa kompleksiniñ yerleşkenini bildire, bu obyektniñ fotoresimi olsa da, olmasa da.

“Fotoresim ve fotoresimde yeterli işaretler olsa, OSINT-istihbarat usulları ve resim talili programmalarınıñ yardımınen bu fotoresim sahtemi-degilmi teşkerile. Bu yerniñ uydu fotoresimleri, meselâ, obyektniñ yerini tasdıqlay. Amma bu em kerçek zenit raketa kompleksi, em mulâjı ola bile. Şunıñ içün radioelektron istihbarat kompleks işini temin etken radiolokatsion stantsiyalarnıñ işini ve bağ vastalarını taqip ete. Bütün kerekli tasdıqlavlar alınğan soñ obyektke darbe endirüv qararı alına bile”, – dep añlata sabıq istihbarat zabiti.

Onıñ aytqanına köre, diger usullar da bar, amma bu endi gizli malümat ola.

FSB sahte malümat azırlay

Rusiye uquq qoruyıcıları ilhaq etilgen Qırımda Ukrayina gizli areketinen ciddiy oğraşa ve bunıñ bir sıra delili bar. Sahte Ukrayina Telegram kanalları ya da sahte kanalları açıla.

“Ateş” areketi böyle sahte kanallar aqqında çoq bildirdi ve abunecilerini “gizlengen” Rusiye uquq qoruyıcılarınen işbirligi aqqında tenbilegen edi.

Ukrayina istihbaratına haber yetkizmek içün tanıtılğan Telegram botları ve çat botlar açıla. Haber etilgenine köre, Rusiye uquq qoruyıcıları sahte resurslar vastasınen muracaat etken qırımlılarnı aldatıp apiske almaq içün stsenariyler yapıla.

Noyabrniñ başında Ukrayina Mudafaa nazirliginiñ Baş istihbarat idaresi rusiyeliler ola bilecek göñüllilerni aldatmaq ve Rusiye içinde tirenüv areketiniñ işini bozmaq maqsadınen Baş istihbarat idaresiniñ mahsus bölüklerine ait dep tanıtılğan sahte Telegram kanalları ve saifelerni açıp, Ukrayina arbiy istihbaratına qarşı informatsion operatsiyalarnı quvetleştirdi, dep haber etti.

“Rusiye Federatsiyası içinde Kreml rejimine tirenüvniñ artmasına qarşı çıqmağa tırışıp, Rusiye mahsus hızmetleri alışqan küreş usullarına qayttı – sahte ve yañlış malümat tarqatmaq. Rusiye propagandacıları Ukrayina Mudafaa nazirligi Baş istihbarat idaresiniñ “Timurnıñ mahsus bölükleri” resmiy resurslarını taqlit etken Telegram kanalları ve içtimaiy ağlardaki saifelerni açuv ğayretlerini faalleştirdi”, – dep aytıla haberde.

Ukrayina Mudafaa nazirligi Baş istihbarat idaresi qayd etkenine köre, Rusiye mahsus hızmetleriniñ maqsadı – göñülli ola bilecek insanlarnıñ aqlını qarıştırmaq, Ukrayina arbiy istihbaratını itibardan tüşürmek ve Rusiyede daa çoq yerni qaplap alğan tirenüv areketine yañı askerlerni celp etüv esnasını bozmaq.