İşğal etilgen Qırımda bir sıra regionda elektrik söndürilip başlandı. Rusiyeniñ esas Ukrayinadaki energetika obyektlerine qarşı kütleviy darbelerine cevap olaraq Ukrayina Silâlı quvetleriniñ Qırım yarımadasınıñ energetikasına qarşı darbe aqibetleri bu oldı. Ukrayina uçucısızları Qırımda bir qaç elektrik ast stantsiyasına zarar ketirdi, dep qabul etti yerli Rusiye akimiyeti. Neler ola, Qırım.Aqiqatnıñ maqalesinde tarif etemiz.
Oktâbrniñ 17-ne keçer gecesi Qırımnıñ çeşit regionlarında patlav seslerini eşitkenler. Rusiye Federatsiyasınıñ Mudafaa nazirligi yarımadada 32 uçucısız yoq etildi, dep bildirdi. Yoq etilemegen uçucısızlarnıñ sayısı aytılmay. Lâkin saba Qırım regionlarınıñ bir qısmında elektrik ve suv yoq edi, çünki elektrik almağan tulumbalar qullanıcılarğa suv berip olamadı. Yerli Rusiye akimiyeti Qırımnıñ energetika obyektleri zarar kördi, dep bildirdi.
“Bir qaç elektrik ast stantsiyası zarar kördi”
Bu künü Qırım yarımadasınıñ çeşit regionlarında elektrik temininde zorluqlar qayd etildi. Qırımnıñ Rusiye ükümetiniñ baş naziri Yuriy Gotsanük regionlarda elektrik hatlarındaki zararlar sebebinden “qazaiy alnı yoq etmek içün” elektrik vaqtınca berilmedi, dep ayttı.
“Vaqtınca sıñırlavlar cedvelleri lâğu etilgeni ve elektrik hat hocalığı obyektlerinde kerginlikni berüv neticesinde elektrik temininde qısmen toqtatuvlar ola bile, donatma bozuluvı ve Qurman rayonı, Canköy rayonı, Saq rayonında elektrik temini hatlarında keçirüvnen bağlı hatlarda lokal söndürüvler ola bile”, – dep ayttı o, üç saattan soñ elektrik temini ğayrıdan tiklenecek dep vade etti.
Qırımda energetika obyekti, nümüneviy fotoresim
Qırımnıñ Rusiye yolbaşçısı Sergey Aksenovnıñ malümatına köre, oktâbrniñ 17-nde uçucısıznıñ ücümi neticesinde Qırımda bir qaç elektrik ast stantsiyası zarar kördi. Amma angileri aytılmay.
Qayda “uçıp keldi”?
“Krımskiy veter” Ukrayinağa qoltutqan Telegram kanalı gece patlavlar eşitilgen Canköy civarlarında “eñ az bir magistral elektrik ast stantsiyanıñ” zarar körgenini bildire.
Şeer sabadan elektrik hatlarındaki qazadan sebep ışıqsız qaldı. Canköyde qazaiy işler sebebinden suv da yoq edi, dep haber etti yerli hızmetler.
Bu afta, oktâbrniñ 13-nde, uçucısızlar Saq issilik elektrostantsiyasına zarar ketirdi, dep bildire saife.
“Dört borulardan biriniñ temelinde donatmalar yandı, episi qap-qara. Tamir işleri paalı olur, dep aytalar. Köy civarlarında darbe vaqtında elektrik bir qaç kere lipildedi, Saq şeerinde ise ışıq ve suv söndürildi (çünki tulumbalar elektrikten çalışa)”, – dep yaza “Krımskiy veter”.
Tobe-Çoqraq gölünden Saq manzarası, arhiv
Saq rayonında oktâbrniñ 17-nde “nişanğa muvafaqiyetli darbe” aqqında “Ateş” Ukrayina arbiy areketi bildire.
“Ukrayina uçucısızları Saq rayonındaki nişanına darbe endirgendir. Şeerde ışıq ve suv yoq oldı. İşğalci akimiyet şaşmalap, bağlarnı tez tiklep olamay. Kökte bütün kün vertolötlar nevbet tuta”, – dep aytıla haberde.
“Kene blekaut dep tüşündik”
Oktâbrniñ 17-nde künniñ ilk yarısında Kezlev de suv ve ışıqsız qaldı. Şeerde mektep ve bala bağçalarınıñ iş cedveli deñiştirildi.
“Tulumba stantsiyalarını elektriksiz qaldırğan ve suv teminini sıñırlağan elektrik zorluqları sebebinden bugün mektep ve bala bağçaları balalar aşatılmayıp qısqartılğan rejimde çalışacaq”, – dep bildirdi şeerniñ Rusiye memuriyetiniñ yolbaşçısı Aleksandr Yüryev.
Kezlev
Eki saattan soñ o, şeerde elektrik temini bütünley ğayrıdan tiklendi, bu da şeer suv teminlevi sistemasını toldurmağa imkân berdi, dep ilân etti.
“Elektrikler berilgenine pek quvandım. Gece kene blekaut oldı, dep tüşündik”, – dep yaza Kezlev sakinleri yerli saifelerde, büyük ihtimalnen, 2015-2016 senelerini aytıp, o vaqıt Qırımda bir qaç ay devamında esas Ukrayinadan elektrik berilmegeni içün elektrik problemleri devam etti.
Oktâbrniñ 17-nde Kezlev civarındaki Terekli Qoñrat (Moloçnoye) köyünde ve Saq rayonınıñ sekiz köyünde elektrikler kesilgen edi, dep bildirdi “Krımenergo”.
Oktâbrniñ 17-nde Qırımda Rusiyege ketken beş tren keç qalğan edi, dep haber etilgen edi. Vaziyetniñ sebepleri aytılmadı.
Qırımnıñ energetika hadimleri yüksek azırlıq rejimine keçe, dep bildirdi “Krımenergo”. Şirketniñ malümatına köre, böyle qarar oktâbrniñ 19-nda ve 20-nde yarımadada ilân etilgen furtuna tenbisi sebebinden qabul etildi.
Qırımda kelecek sefer elektrikler daa uzun vaqıt olmasa qasevetleneler.
“Belki, suv tulumbaları içün yüksek küçlü generatorlar olmalı? Ya bir afta ışıq olmasa? Er kes suvsız oturacaqmı? Ya hastahane ve mektep, bala bağçaları ne olacaq?”, – dep yaza yerli qullanıcı.
“Elektrik ast stantsiyaları – Rusiye ordusınıñ logistikası”
Oktâbr ayında Qırımnıñ elektrik ast stantsiyalarına qarşı darbeler Rusiyeniñ Ukrayinağa qarşı büyük istilâsı çerçivesinde esas Ukrayinadaki energetika infrastrukturası ve issilik elektrostantsiyalarını yoq etüv ıntıluvlarına cevap oldı.
Bunıñnen beraber Ukrayina Silâlı quvetleri Qırım yarımadasında cermay bazaları ve uçaq alanlarına ücüm ete. Böyle obyektlerge qarşı darbelerniñ Zaporijjâ yönelişinde arbiy vaziyet içün strategik emiyeti bar, dep tüşüne Ukrayina Silâlı quvetleriniñ Qara küçleri Yedekçiler şurasınıñ yolbaşçısı İvan Timoçko.
Rusiye arbiy tehnikası Qırımda «Tavrida» yolunda, arhiv
Onıñ aytqanına köre, bu yönelişte Qırımdan Rusiye ordusına esas yardım temin etile.
“Elektrik stantsiyaları, cermay bazaları, “Kaça”, “Gvardeyskoye” ve “Saki” uçaq alanlarına darbelerimiz – Zaporijjâda ücüm ordusına qoltutacaq Rusiye ordusınıñ logistikasına qarşı darbeler. Olar anda küçüni topladı. Ukrayina Silâlı quvetleri Rusiye ordusı bulunğan yönelişte ciddiy darbeler endirdi ve Orehov yönelişinde topraqlarnıñ bir qısmını keri aldı”, – dep ayttı o.
Ukrayina prezidenti Volodımır Zelenskıy Rusiye Ukrayina energetikasına qarşı “darbelerni kene birleştire” ve “buña cevaplar bar ve olacaq”, dep ayttı.