Qırım evinde Qırımtatar halqınıñ merasimleri aqqında añlatqan "Qırımnıñ canlı mirası. Adetler" vesiqalı leyhasınıñ birinci bölümi taqdim etildi. Umumen leyhada üç qısqa film olacaq — "Adetler", "Esnaflar" ve "Aşlar". Leyha üzerinde rejissör Serğiy Şarayevskıy, yazıcı ve stsenarist Andriy Kokotüha ve mesleatçı Mavile Halil çalıştılar. Müelliflerniñ maqsadı, tarihiy sınavlarğa baqmadan, alâ daa nesilden nesilge keçken qırımtatar ananelerini köstermek edi. Premyerağa Qırım.Aqiqat mühbiri keldi .
Rejissör Serğiy Şarayevskıy içün bu qırımtatarlarğa bağışlanğan ekinci leyhadır, daa evel o, "Perekop arqasında. Devlet" filmi üzerinde çalışqan edi.
"Men Ukrayinadaki eki inqilâpnıñ faal iştirakçisi edim. Qırımnıñ işğali menim içün pek ağır edi, ukrayinalı olaraq sanki menim bir qısımımnı alıp kettiler. Vatannı coyğan qırımtatarlarnıñ duyğularını tasavur etip olamayım. Şunıñ içün bu film menim ruhumdan keçti", — dep tarif etti Şarayevskıy Qırım.Aqiqatqa bergen izaatında.
Onıñ aytqanına köre, Qırımnı köstermek eñ büyük qıyınlıq oldı, çünki yarımadağa irişim yoq. Şarayevskıy emin ki, olar bir yol tapıp oldılar.
"Qırımnıñ canlı mirası. Ananeler" filminiñ müellifleri Qırım evinde taqdim merasiminde
Rejissör Sergey Şarayevskiy, film üzerinde çalışqanda özü de çoq yañı şeyler ögrengenini ayta. "Misal içün, "turka" sözü bar, amma bu "cezve" eken. Ya da "çeburek" kerçekten "çiberek", — dep ayta Şarayevskıy.
Rejissör Serğiy Şarayevskıy
Qırımtatar Milliy Meclisiniñ reisi Refat Çubarov filmni baqqan soñ, böyle müsbet teessuratlar olacağını beklemegenini ayttı. Onıñ qayd etkenine köre, Rusiye ukrayinler ve qırımtatarlarnı yoq etmege tırışqan vaqıtta, böyle leyhalar kerek.
"Ukrayinler — rusiyeliler, qırımtatarlar mında iç bir vaqıt olmadı, olar anda [Qırımda] yaşamadı, mında ecnebiyler ve ilâhre", — dep israr eteler. İnsanlar qorçalavğa turğanda, biri-birini ögrenmek içün böyle şekiller pek müimdir", — dedi Çubarov Qırım.Aqiqatqa bergen izaatında.
Refat Çubarov, Qırımtatar Milliy Meclisiniñ reisi
Ne içün qırımtatar oyunında er bir areketniñ emiyeti bar, balalar ne içün balalıqtan başlap qave içmege alışqan, erkekler ne içün qavehanelerge barğan, qadınlar ise qavehanelerge ne içün barğanını yaqın zamanda ögrenecekmiz. Müellifler, leyhanıñ üç bölümi de orta küz ayınıñ 27-nde YouTube-da açıq irişimde olacaq, dep vade eteler.
Mavile Halil qırımtatar mevzusı boyunca mesleatçı