Kyivde “Boş kürsüler” aktsiyası – cenk sebebinden apiske alınğan ukrayinalılar aqqında hatırlatma (fotoresimler)

Ğayıp olğan, apiske alınğan ya da Rusiyeniñ Ukrayinağa qarşı cenki sebebinden apiske oğrağan jurnalist, yazıcı, medeniyet erbapları ve aq qorçalayıcılarğa qoltutmaq maqsadınen er yıl keçirilgen “Boş kürsüler” aq qorçalayıcı aktsiyası 2025 senesi noyabrniñ 15-nde olıp keçti. Tedbirni Ukrayina PENi ve Vatandaş serbestlikleri merkezi teşkil ettiler

“Boş kürsüler” aktsiyasında apisten azat etilgen Mıkola Semena, Vladıslav Yesıpenko, Maksım Bütkevıç, Dmıtro Hılük, Leniye Umerova, Yuliya “Tayra” Payevska iştirak ettiler. Kyiv, 2025 senesi noyabrniñ 15-i. Fotoresimde jurnalistler: Qırım.Aqiqat müellifi (Azatlıq Radiosınıñ leyhası) Mıkola Semena (sağdan) ve Qırım.Aqiqatnıñ serbest hadimi Vladıslav Yesıpenko (ortada)

Leniye Umerova, Maksım Butkevıç ve Dmıtro Hılük Kyivde “Boş kürsüler” aktsiyasında, 2025 senesi noyabrniñ 15-i. Olarnıñ kürsüleri artıq boş degil, olar azat etildi

Tedbir Ukrayinağa qoltutqan ve qanunsız şekilde tutulğan vatandaş şahısları ve cenk reineleriniñ azat etilmesi oğrunda küreşken insanlarnıñ ğayretlerini birleştirdi. Kyiv, 2025 senesi noyabrniñ 15-i

Yuliya "Tayra" Payevska “Boş kürsüler” aktsiyasında, Kyiv, 2025 senesi noyabrniñ 15-i. İştirakçiler ğayıp olğan, qanunsız tutulğan ve reine olğan ukrayinalı müellif, sanat erbapları ve aq qorçalayıcılarnıñ ikâyelerini tarif etti.

Mabüs yazıcı ya da Boş kürsüler künü (Empty Chair Day) noyabrniñ 15-nde Halqara PEN teşebbüsinen qayd etile. 2018 senesinden başlap Ukrayina PENi Vatandaş serbestlikleri merkezinen beraber ukrayinalılar ve dünyağa Rusiye istilâsı sebebinden bu künde yanımızda olamağan yazıcı, sanat erbapları ve bütün ukrayinalılar aqqında hatırlatmaq içün aq qorçalayıcı aktsiyanı teşkil ete

Kütleviy malümat institutınıñ malümatına köre, bugün eñ az 26 vatandaş Ukrayina media hadimi ve bir kombatant jurnalist apiste buluna. Lâkin aq qorçalayıcı teşkilâtlar işğal etilgen topraqlarda jurnalistler taqip etilgenine ve apiske alınğanına dair malümat ala

Rusiyeniñ büyük istilâsı başlağanınen umumen 119 media hadimi elâk oldı, dep bildire Kütleviy malümat institutı. 15-i – vazifesini yapqanda, 14-ü – vatandaş olaraq ve 90-ı cenk areketlerinde

İnsan aqları vekâletlisiniñ ofis malümatına köre, qanunsız tutulğan aman-aman 16 biñ vatandaş Rusiyede ve vaqtınca işğal etilgen topraqlarda tutula, amma raqam qat-qat büyük ola bile. Aynı vaqıtta, 2024 senesiniñ soñunda hususiy vaziyet tışında ğayıp olğanlar cedvelinde 70 biñ insan aqqında malümat bar. Fotoresimde apisten azat etilgen Vladıslav Yesıpenko, Yuliya “Tayra” Payevska, Leniye Umerova, Maksım Butkevıç, Dmıtro Hılük (soldan sağğa). Kyiv, 2025 senesi noyabrniñ 15-i