Qırımtatar resurs merkeziniñ yolbaşçısı ve Qırımtatar Milliy Meclisiniñ azası Eskender Bariyevniñ bildirgenine köre, 2017-2025 seneleri insan aqlarınıñ 10 biñden ziyade bozuluvı qayd etildi, 6 biñden ziyadesi qırımtatarlarğa qarşı oldı. Bu aqta o, Facebookta yazdı.
Siyasetçi noyabrniñ 27-28-nde Berlinde olıp, anda Rusiye Federatsiyasında tamır halqlarnıñ vaziyetine ve ğurbette olğan Rusiye demokratik quvetlerinen işbirligine bağışlanğan Tamır halqlarnen dialog platforması keçirildi.
Bariyev "Tamır halqlar – Rusiyeniñ Ukrayinağa qarşı arbiy istilâsı vaziyetinde insanlıqqa qarşı cinayet qurbanları ve arbiy cinayetler" mevzusında maruzasınen çıqışta bulundı.
Onıñ malümatına köre, Rusiye akimiyetiniñ 2025 senesiniñ ilk doquz ayı devamında qullanğan qabaatlavlar arasında eñ çoq – "casuslıq", "devlet hainligi", Noman Çelebicihan batalyonında iştirak etüv, "Rusiye Federatsiyası Silâlı quvetlerini itibardan tüşürüv", "Hizb ut-Tahrir" ve ilâhre.
Bariyevniñ bildirgenine köre, apishanelerde tutulğanlar:
- 41 qadın,
- 64 genç,
- 28 esli-başlı kişi,
- 10 saqat.
Bariyev kelişmegen tutuv şaraitleri ve kösterilmegen tibbiy yardım sebebinden Rusiye apishanelerinde üç siyasiy mabüs elâk oldı, dep qoştı: Konstantin Şiring, Rustem Virati ve Cemil Gafarov.
Qırımtatar resurs merkeziniñ malümatına köre, Qırım işğali vaqtında qayd etilgenler:
- 477 siyasiy mabüs ve cinaiy "davalar" boyunca taqip etilgenler, 269-ı – qırımtatar halqınıñ vekilleri;
- 61 insan elâk oldı, 29-ı – qırımtatarlar;
- 32 insan hırsızlandı, 18-i – qırımtatarı.
Bariyevniñ aytqanına köre, Rusiye SİZO ve koloniyalarında al-azırda 316 qırımlı siyasiy mabüs tutula, 176-sı qırımtatar halqından ola.