Rusiye işğal etken Aqyarda tünevin aqşam ava telükesi ilân etilgen edi. Rusiye kontrolindeki şeer yolbaşçısı Mihail Razvojayev öz Telegram kanalında telüke aqqında saat 21:18-de ve 22:01-de bitkenini bildirdi. Onıñ qayd etkenine köre, "arbiyler Ukrayina Silâlı quvetleriniñ ücümini keri qaytara, ava mudafaası çalışa".
Aqyarda ava telükesi aqqında "Krımskiy veter" Telegram kanalı da bildirdi, "ava telükesi "Belbek" uçaq alanındaki ilk patlavlardan bir saat keçken soñ ilân etildi".
Rusiye Mudafaa nazirligi bildirgenine köre, "noyabrniñ 30-nda Moskva saatınen 20.00-den 23.00-ke qadar ava mudafaasınıñ nevbetçi vastaları on Ukrayina uçucısızını tuttı ve yoq etti: doquz uçucısız – Belgorod vilâyetinde, bir uçucısız – Qara deñizde".
Rusiye Mudafaa nazirligi "keçken gece noyabrniñ 30-nda saat 23.00-ten dekabrniñ 1-nde saat 7.00-ge qadar ava mudafaasınıñ nevbetçi vastaları 32 Ukrayina uçucısızını qayd etip yoq etti", dep bildirdi.
Aqyarnıñ Qurtaruv hızmeti haber etkenine köre, şeerde vatandaş obyektleri zarar körmedi.
Razvojayevniñ aytqanına köre, "Pobeda" parkında urıp tüşürilgen ava nişanınıñ parçaları 15 yaşında qıznı yaraladı.
Onıñ malümatına köre, yaralanğan qız ağı alda buluna, tibbiy yardım kösterile. Gece ekimler bir qaç ameliyat yaptı.
"Ukrayina Silâlı quvetleriniñ Aqyar ücüminden yaralanğan qızçıqnıñ alı pek ağır ve stabil degil olaraq qayd etildi", – dep ayta Razvojayev Telegram kanalında.
Alı stabil olsa, onı Moskvağa alıp ketmege planlaştırıla.
Ukrayina tarafı bu haberlerni daa izaatlamadı.
Cenk vaziyetinde muarririyet bu malümatnı teşkerip olamay.
2022 senesinden başlap yarımadağa er kün ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.