Rusiyeden Gürcistanğa künaylan yağı yükünen ketken "Midvolga 2" tankeri Qara deñizde Türkiye yalısından 80 milde ücümge oğradı, dep bildirdi. Bu aqta dekabrniñ 2-nde saba Türkiye Naqliyat ve infrastruktura nazirligi haber etti.
Gemide 13 ekipaj azası bar edi. Olar yaralanmağanını, yardımğa ihtiyacları olmağanını bildirdi.
"Çalışqan köçüricilernen gemi Sinop (Türkiye limanı) yönelişinde areket ete", – dep aytıla haberde.
Tanker nasıl ücümge oğradı aydınlatılmay.
VesselFinder portalınıñ malümatına köre, "Midvolga 2" tankeri 2014 senesi quruldı ve Rusiye bayrağı altında yüre. TASS Rusiye agentligi yazğanına köre, gemi saibi – Orta Edil gemi şirketidir.
Noyabrniñ 28-nde "Kayros" ve "Virat" tankerleri (Gambiya bayraqları altında yüre) aman-aman aynı vaqıtta deñiz dronlarınıñ ücümine oğradı. Ücüm vaqtında "Kayros" Türkiye yalısından 28 deñiz mili, "Virat" – 38 mil mesafesinde edi. Ertesi künü Ukrayina kütleviy haber vastaları Ukrayina telükesizlik hızmetiniñ menbasına esaslanıp, bu zemaneviyleştirilgen dronlarnıñ yardımınen kerçekleştirilgen Ukrayina telükesizlik hızmetiniñ mahsus operatsiyası edi, dep yazdı. Menba ücüm etilgen tankerler "aman-aman 70 million dollarlıq cermay taşıması ve Kremlge halqara sanktsiyalardan qurtulmağa yardım etmesi mümkün edi", dep bildirdi.
Türkiye tankerlerge qarşı ücümler "regionda gemi areketi, yaşayış, mülk ve ekologik telükesizlik içün ciddiy telüke" yaptı, dep bildirdi.
