Kyivniñ Solomenskıy rayon mahkemesi "Millet" Qırım telekanalınıñ alıp barıcısını ğıyabiy şekilde mülkini musadere etmek qararınen 11 yılğa üküm etti. Onı 15 yıl devamında devlet akimiyeti ve idare organlarında çalışmaq aqqından da marum ettiler.
Bu aqta Yekâne mahkeme qararları devlet cedvelinde derc etilgen ükümde aytıla.
Ukrayina mahkemesi jurnalistni işbirlikçi faaliyette (Ukrayina Ceza kodeksi 111-1 maddesiniñ 6-ncı qısmı) ve Rusiyeniñ Ukrayinağa qarşı silâlı istilâsını aqlav (Ukrayina Ceza kodeksi 436-2 maddesiniñ 3-ünci qısmı) qabaatlı dep tanıdı.
Davada aytılğanına köre, mahküm "işğalci memuriyetnen işbirligi yapıp, "Neticeler" yayınında istilâcı devlet Rusiye Federatsiyasınıñ areketlerine açıq-açıq qoltuttı". O, "Qırım baari" ve qanunsız "referendum" aqqında bir qaç kere hatırlatıp, yarımada işğalini "birleşüv" ve "tuvğan yurtuna qaytuv" olaraq tarif etti.
Bundan ğayrı, alıp barıcı Rusiyeniñ Ukrayinağa qarşı büyük istilâsına qoltuttı.
Qırım Muhtar Cumhuriyeti ve Aqyar prokuraturası mahkümniñ adını aytmay. Suspilne menbalarına köre, laf Ayşe Şulakova aqqında kete. Qabaatlav 2024 senesi aprel ayında mahkemege yollanğan edi.
Şulakova ya da imayesiniñ ükümnen bağlı er angi açıq izaatları şimdilik yoq.
