Rusiye Fevqulâde vaziyetler nazirligi ve Rusiye Federatsiyasınıñ diger hızmetleri orta küz ayınıñ 13-ne keçken gecesi işğal etilgen Qırımda yüz bergen "darbeler"niñ aqibetlerini yoq etmege devam eteler. Yerli faalniñ malümatına köre, Rusiye akimiyeti Kefe neft bazasında yüz bergen yanğın sebebinden qırımlılarnıñ ihtiyaclarını kömemezlikke ura. Bu aqta tafsilâtlıca Qırım.Aqiqat içün bergen intervyüsında oquñız.
Orta küz ayınıñ 13-nde neft bazasından ğayrı, Kefede "Kafa" elektrostantsiyası zarar kördi, neticede bölgrniñ bir qısmı yarıqsız ve suvsuz qaldı. Şeerde Keriç şossesi ve Fedko soqağı boyunca areket qapatıldı.
Yerli faalniñ qayd etkenine köre, neft bazasındaki yanğınnı söndürmek içün ketirilgen tonna suv kurort şeerinde büyük ekologik problemlerni yarata.
"Bütün bu suv, neft mahsulatınen qarışıp, deñizge, topraqqa ve yerastı suvlarğa kete. Bu, bu kibi obyektlerdeki yanğınnı söndürmek içün eñ büyük ve ekologik telükeli usuldır. Akimiyet, neft bazası ücüm nişanı olğanını bile edi, şunıñ içün onı söndürmek içün semereli usullarnı qullanmaq kerek edi, şimdi ise mında tonnalarnen suv tökip, kurort regionınıñ ekologiyasını yoq ete", — dep tarif etti faal.
Faalniñ malümatına köre, yerli eali içün problemler Keriç trassasınıñ qapatıluvı sebebinden peyda ola, Keriçniñ Beregovoye ve Primorskoye qasabalarınıñ sakinleri işke ketmek içün 45 kilometrlik yol keçmege mecbur olalar.
Faallerniñ malümatına köre, Kefede alâ daa avadan ücüm telükesi olsa, sirenalar çalışmay.
"Kefe bölgesinde telükesizlik haberdar etüv sisteması yoq. Ve bu, muntazam olaraq yapılğan ava telükesi olğanına baqmadan. İnternetniñ sıq söndürilüvi şaraitinde insanlar malümatsız qala. Yerastı binalar sanki sığınaq ola, bu insanlarnıñ ayatlarına lâqayt yanaşuvdır. Qapılar qapalı, anda keçici gizlenemez. Kütleviy silâlı quvetlerniñ ücümleri doğru ve ealige zarar ketirmey, amma ücüm etken pilotsız uçaq ve raketalarnıñ sayısı arta, şunıñ içün şeer üzerinde ava mudafaası sisteması tarafından aks etilgende eali içün telüke arta", dep qayd etti faal.
Kefe sakinleri şeer ve civarındaki ava vaziyetinden qasevetlene.
"Akimiyetniñ ava vaziyeti aqqında susqanı, yelniñ yönelişine köre dumannıñ büyük miqdarda bir tarafqa, yelsiz vaqıtlarda ise şeerge tığız duman tüşkeninen, insanlarnıñ, hususan bala ve esli başlılarnıñ sağlığı içün qasevet doğura. Bu meselede iç bir talimat yoq, şunıñ içün insanlar havfsızlıq tedbirlerini körmemezlikke uralar", — dep tarif etti faal.
Faalniñ aytqanına köre, Rusiye ava mudafaası Qırımdaki vazifelerini daa beter becere.
"Qırım üstündeki maqtağan Aksönov qubbesi daa çoq bozuluvlar ketire. Birinciden, ZSU ücümleri daa yahşı azırlanğan ve daa çoq yapılğan, bu da olarnı daa muvafaqiyetli yapa. Ekinciden, Qırımda çoq ava mudafaa sistemaları zarar kördi, çoqusı öz resurslarını qullanıp bitti, lâkin kerekli deñiştirüvler yoq. Üçünciden, menbalarımnıñ malümatına köre, ava mudafaasınıñ Qırım bölüklerinden bir çoq arbiyni "SVO" zonasına yollanıldı, ve arbiyler qoyulğan vazifelerni daa da yaramay becere", — dep bildirdi faal.
Qırımnıñ rusiyeli akimiyeti, tek resmiy malümatqa inanmağa çağırıp, arbiy obyektler ve infrastruktura zarar körgenini gizlemek içün bütün tedbirlerni ala.
"Amma eki afta evelsi Kefe neft bazası yanğınğa oğrağanda Qırımnıñ Rusiye yolbaşçısınıñ mesleatçısı Oleg Kırıçkov yanğın qaynaq işleri sebebinden yüz bergenini bildirgen olsa, resmiy malümatqa nasıl işana bilesiñiz? Bundan soñ kim oña ve diger "resmiy" menbalarğa inanacaq?" — dep soray faal.
Faalniñ qayd etkenine köre, işğal etilgen Qırımda insanlarnıñ Rusiye akimiyetine olğan işanç seviyesi tüşe, birinci nevbette eali ile açıq dialog olmağanı sebebinden.
Berilgen malümatqa köre, Kefede olğan ücüm neticesinde 11 konteyner zarar kördi, olardan 10-da yaqıt bar edi, 830 adam tahliye etildi. Rusiye akimiyeti ve Rusiye Fevqulâde vaziyetler nazirligi ücümniñ konkret aqibetleri aqqında resmiy şekilde haber etmey.
