Türkiye prezidenti Recep Tayyip Erdoğan Rusiye lideri Vladimir Putinnen telefonda laf etti, dep haber etti eki tarafnıñ matbuat hızmetleri noyabrniñ 24-nde.
Erdoğannıñ ofisi bildirgenine köre, subet eki taraflı munasebetler, Rusiye-Ukrayina cenki, regional ve global meselelernen bağlı edi.
“Prezident Erdoğan Türkiye Rusiye-Ukrayina cenkini adaletli ve turğun barışıqnen bitirmek içün ğayret köstermege devam etecek, dep bildirdi”, – dep aytıla haberde.
Türkiye prezidenti Ankaranıñ taraflarnıñ doğru muzakereleri ve regionda barışıqnıñ ğayrıdan tiklenmesine yardım etecek bütün diplomatik teşebbüs ve planlarğa qoşulmağa azır olğanını tasdıqladı.
Putinniñ matbuat hızmeti qayd etkenine köre, muzakereler “ileride ticaret-yatırım bağlarınıñ kenişletilmesi ve energetika saasında strategik ceetten emiyetli leyhalarnıñ yerine ketirilüvine ketirecek eki taraflı işbirliginen” bağlı edi.
Kremlniñ malümatına köre, taraflar “Ukrayinanen bağlı fikirlerini ayttı, hususan Amerikanıñ barışıq tekliflerine diqqat ayırdı”.
“Ukrayina etrafındaki vaziyetnen, hususan Amerikanıñ barışıq tekliflerinen bağlı fikirler aytıldı”, – dep bildire Rusiye prezidentiniñ matbuat hızmeti.
Haberge köre, Putin Moskva alğan ABD teklifleri Alâskadaki Rusiye-Amerika körüşüviniñ muzakereleri yönelişinde kete ve “barışıq temeli ola bile”, dep bildirgen eken.
Jenevada ABD teklif etken barışıq planınıñ muzakereleri keçirildi. ABD, Ukrayina, Avropa devletleriniñ vekilleri iştirak etti. Muzakereler neticesinde ABD ve Ukrayina “bayağı bir ilerilev” köründi ve çerçiveli barışıq añlaşması “âñartıldı ve tüzetildi”, soñki qararnı prezidentler alacaq, dep bildirdiler.
ABD prezidenti Donald Trumpnıñ memuriyeti tarafından teklif etilgen ve Kyiv tarafından Rusiyege pek dostane oldı dep tenqit etilgen 28 maddeli barışıq planına kirsetilgen deñişmeler aydınlatılmadı. Trump Jenevadaki muzakerelerden soñ “Rusiyeniñ Ukrayinağa qarşı cenkinde yahşı bir şeyler ola bile”, dep tahmin etti.
