Rostov-na-Donudaki Rusiye Cenübiy okrugınıñ arbiy mahkemesi "qırımlı musulmanlar davası" birinci Canköy gruppasınıñ beş mabüsine üküm çıqarıp, 13 yıldan 19 yılğa qadar azatlıqtan marum etti. Bu aqta "Qırım birdemligi" cemaat birleşmesi ve Rostov-na-Donu Cenübiy okrugınıñ arbiy mahkemesiniñ matbuat hızmeti haber eteler.
Mahkeme haberine köre, "Hizb ut-Tahrir" teşkilâtı ile alâqalarında qabaatlanğan faal Enver Kroşqa 19 yıl, Edem Bekirov ve Rinat Aliyevge – 15-er yıl, jurnalist Vilen Temeryanovğa – 14 yıl, Seitâğya Abbozovğa 13 yıl apis cezası berdi. Mahkeme ilk 4 yılını Enver Kroş apishanede, qalğan cezasını sert rejimli koloniyada qalmasını belgiledi. Diger mabüslerge mahkeme üç yıl apishanede ve qalğan cezalarını koloniyada yatmalarına qarar berdi.
"Qırım birdemligi" yazğanına köre, Abbozov Rusiye kontrolindeki Qırım garnizon arbiy mahkemesinde apiske alındı, andan o, videokonferentsiya vastasınen mahkemede iştirak etti. Qırımlı tutulğan soñ ev apsinde edi.
"Men terrorizm ve akimiyetniñ zapt etilmesine bir alâqam olmağanını bildirem. Bunı saçmalıq olaraq körem – o qadar vaqıt sarf etip, bunı incelemek. Mahkeme tarafsız olsa, oña aqlı olğanımnı yeterli qadar isbatladım, dep tüşünem. Üküm çıqarğanda biliñiz ki: tek bizge degil, birinciden ana, apay, balalarımızğa üküm çıqarasıñız. Men acımañıznı istemeyim, kerçeklerni aytam. Netice ne olsa olsun, men Rabbime işanmağa ögrendim", – dedi Enver Kroş, mahkemede soñki sözüni aytıp.
Enver Kroşnıñ advokatı Emil Kurbedinov soñki söz vaqtında "Qırım birdemliginen" laf etip, dava mabüsleri ve imayecilerinden iç birisi "siyasiy bir sımarışnıñ adaletli bir çezilüvi olacağını beklemey", dep qayd etti.
2022 senesi arman ayınıñ 11-nde saba Qırımnıñ Canköy ve Canköy rayonında qırımtatar faalleriniñ evlerinde kütleviy tintüvler keçirildi, advokatlarnı tahqiqat tedbirlerine yibermediler, olar mobil bağnıñ kesilgenini bildirdiler. Vilen Temeryanova, Enver Kroş, Seityaya Abbozov, Murat Mustafayev, Edem Bekirov ve Rinat Aliyevni Rusiye quvetçileri Rusiyede yasaq etilgen "Hizb ut-Tahrirde" iştirak etkenlerinde qabaatlap yaqaladı.
İmaye tarafı bildirgenine köre, bu davanıñ esas delili 2015 senesi camide qayd etilgen subet sesi oldı. Emir Kurbedinov emin ki, onı sekiz yıldan soñ FSB arhivlerinden alğanlar. "Bu yıllar devamında bu insanlar taqip etilmeddi ve cemiyet içün bir telüke köstermedi", – dedi imayeci.
Mahkeme tahqiqatı vaqtında ne advokatlarğa, ne müvekkillerine mahkeme ekspertizağa yollağan malümatnen tanış olmağa imkân berilmedi. Bu müddet devamında mabüs qırımtatar faalleri tarafından bir terror ücümi ya da diger zorbalıq areketleri planları olmadı.
